A la tlai lo

Chapter 3

By Red Wheelchair · ~8 min read

Faki nen dawhkan kan kil dunlai pawh chuan Hriati chu ka rilru ah a cham zui reng a, mut theih loh phah nan ka hmang zui lo hlauh a, ka lawm khawp mai. Hriati ka tawng meuh chu ka tleirawl tha leh hi a ni ringawt. Computer min zirtir ka thiam lo lutuk chu mak a ti thei hle a, laptop hmang in min zirtir mai zel a ni. Refresh dan thleng thleng erawh chuan ka thiam lo duh bik lo a. Hriati bul a awm chu a nuam ka ti tak meuh a, inanna kan nei nual bawk nen thil tamtak kan sawi dun thin. Kei lah nauawmtu an awm avangin pawn lam ah hun ka nei thei phian bawk si a, nikhat ah darkar 2 lek hi chu kan inzirtir khat khawp mai. Kan pel fo zawk a ni, tei kual vel mai mai chang pawh kan ngah a lawm. Tun ah chuan hun rei tak kal ta a ka hloh tawh ka nui hmel dik tak pawh kha ka nei let leh tawh a, hlim takin ka nui veleh thei ta.


Nupui neih tawh chuan nula bul a hun hman tam a har tih hi chu ka tan chuan tih mai mai a ni. Kan nu a hna ah a buai em em a, kei ka hna in a lo zir bawk nen a awlsam ang reng phian zawk. Hriati hnen ah chuan ‘vawiin chu chawl ang aw’ ka ti a, Hriati chuan, ‘i thiam loh tehreng nen taima deuh in zir mai mai rawh‘ min ti a, Kei chuan, ‘aih ka peih lo, ka peih loh chuan ka thiam thei dawn chuang lo, chuvangin, vawiin chu kan chawl ang’ ka ti tlat a. Ka kut ka’n vai vel a hmuhin Hriati chuan, ‘Nupui i nei tawh a mi?’ min ti chu ka nuih a za nasa mai a, ‘i la hre nange?’ ka tiin ka chhang a, Hriati chuan, ‘hre nang i zungbun kha ka rawn hmu a, ka zawt mai mai che’. a ti a, Kei chuan ‘e. a hma a ka bun kha chu a langsar lo em a lawm tiraw? nupui ka neihna chu a rei tawh mai. Fa pawh kum 5 mi ka nei tawh a lawm. Tlangval ka ni tawh hleinem. Hriati’ ka ti a, za lo zetin ka nui hak bawk a. Hriati chuan, ‘mipa nge hmeichhia?’ a lo ti a, Kei chuan ‘kan nu maw? Hmeichhia.. hmeichhia lo te chu ka duh hleinem’ tiin ka chhang kual a, Hriati chu a nui a ‘i fa zawk chu a nia ka tih’ a ti a, Kei chuanm ‘mipa mawle, a duhawm rual lek a la ni a, min ti hlim ve thei lutuk.. aw khaih! ka chhhungkaw chanchin ka sawi ta chiam a. i nin leh nin loh pawh ka lo ngaihtuah miah lo’ in thiam lo deuh tak hian ka ti a, Hriati chuan, ‘aih, sawi zel rawh ka ngaithla duh a lawm. Ka la hmabak ve tho a nia’ a ti a, Kei chuan ‘sawi tur vak pawh a awm tawh lo, engtin pawh ngaihtuah chhunzawm la a dik vek tho ang’ ka ti hul hak a, ngawi rengin rei tawk fang kan thu dun ren rawn a, ‘kan zir leh si mai dawn mi?’ ka ti a, Hriati chuan ‘vawiin chu chawl law law mai ang, I thil sawi kha ka la ngaihtuah chhunzawm a’ a ti a, Keimah bawk chuan, ‘a nih leh inkhel en mai ang hmiang ka en chak khaawp mai MIZORAM vs GOA, a hmuhnawm viau ang. Tuna kan chak leh chuan Semi Final kan lut tawh dawn! match puitham tak a ni ang, final match ni zawk se tha tur’ ka ti a, Hriati chuan ‘a nih leh va en i la’ a ti ve mai a, kei chuan nui chungin ‘en chu ka en chak lutuk a mahse ticket ka nei reng reng hleinem’ ka ti a, Htiati chuan, ‘i ho em mai a’ a ti hlak a, Kei chuan, ‘tak tak ah ticket chu ka ngaihtuah thei mai in ka ring stadium lamah kal phawt ang’ ka ti a, taxi phar din ka tum lai chuan Hriati chuan, ‘ Ke in kal zawk ang, kal pah a thil hrilh tur che ka nei’ a tih avangin, ke in kan kal ta zawk a.


Kawng chanve kan thlen hnu pawh chuan kan la ngawi reng a, Kei chuan ‘ummm hmmm’ ka’n ti ringawt a, rang takin Hriati chuan, ‘i nupui chu i duh tak tak lo a ni tiraw?’ tiin min zawt a, Kei chuan ‘hei ka duh a, ka la nei chu a nia’ ka ti a, Hriati chuan, ‘tak tak maw?’ awih vak hmel loh tak hian a ti leh a, Kei chuan, ‘ka ti mai mai a nih kha a awlsam zawngin sawi ta ila ka nep em vang a ni ti ila a chiang ber ang’ ka ti a, Hriati chuan, ‘pawi ka tihpui khawp mai che’ min en vang vang chung hian a ti a, Kei chuan, ‘i nun kha hlim deuhin hmang zawk rawh. Ka tihsual ang rawn tisual ve lo la, kei chu ka hlim a nimai. hlimnate hi chu a awm zel mai a lawm. Hlimna tak tak hmu tur erawh chuan fimkhur hle ang che. Hmuh a har talh a nia’ awm ze nei tak hian ka ti a. Hriati chuan min en chungin, ‘kan thleng e’ a ti a, ticket te chu ka’n ngaihtuah zung zung a, kan nei thei ta chuang lo a, kan lut ru thei ta hram zawk a.


Inkhel an tan atanga minute thum hnu vel ah kan lut a, mipui au thawm a ring khawp mai. Hriati pawh a au nasa, a au a, a zuang bawk a, tang tak hi a ni. Kei chu inkhel ka en hian ka au ve peih ngai lo a, en melh melh hi ka duh zawk thin. Mahse hemi tum hi chu rilru ah inkhel a tla na tlat lo. Pitch a players te chetla vel ai chuan Hriati chetla vel en reng ka thlang zawk. kan nu chuan min rawn phone a, a bengchhen em avangin a tawng ka hre tha thei lo a, beng lehlam hup chungin a tawng chu ka hre thei ta. ‘inkhel i en a nimaw? Min han hrilh ve tur che a nia.’ a tih vel chu ka hre thei a. Hriati chuan nui sangin ‘i nupui a law?’ a ti lo a, Kei chuan ‘aw ni e’ ka ti ve mai a, inkhel chu a en chhunzawm lehnghal a. Hriati chuan ‘Mal, jersey no 28 saw tunge?’ a ti a, Kei chuan ‘Ramenga a nih saw’ ka’n tithla ngawt a, a nihna tak ah chuan tunge a nih ka hre miah lo, a chhan chu ka en ve tlat lo a ni. Hriati’n inkhel a en a, keii n Hriati ka en thung a, hmuhnawm kan ti dun khawp mai. ‘tunah khan engtin maw min koh?’ ka ti leh thut a, Hriati chuan, ‘Mal ka ti che, chutiang chuan an ko ngai lo che a mi?’ min ti a, Kei chuan, ‘aih chutiang chuan tuma’n min ko ngai lo, “Mal” tiin min ko tawh suh, “Zuala” min ti rawh ka tih che kha’ ka ti zek a, Hriati chuan ‘ka ti tawh lo ang’ inthlahrun hmel takin a ti a. Ni e.. ka hming chu a ni ve ve na a, Mal tih hming a min koh chuan awmzia engemaw tak a nei a ni. Ka tlangval lai chanchin te pawh a nimahna. Chutilam chu sawi duah lo phawt mai i la tunah chuan nupui fanau nei ka ni tawh a, khang hun kha chu a liam tawh. Hriat reng ai chuan theihnghilh hi a tha zawk theihnghilh thei tak tak lo mah ila.


A hnuah chuan ka in thiam lo leh deuh a, Hriati bulah chuan ka va ding ve a, kan au ve vel a, a hma kha chuan a hnung ah ka ding a, chuvangin a nia duhtawk a ka thlir theih.. Hriati bul a ka din atanga reiloteah inkhel chu a tawp nghal a, tute nge chak zawk tih pawh ka hre lo, ka en tlem lutuk a, Hriati en reng chung chuan chak zawk hriat a har khawp mai. Inkhel a zawh chuan kei aia palian daih zawk hian min rawn din hliah a, Hriati nen chuan an inchibai nghal a, inlawmpui tawn nan midang pawh chuan an rawn chibai sap sap bawk a. Hriati chuan hmelhriat a lo ngah kher mai. Hetiang a phut suau suau hi nuam ka tih ve vak loh avangin a sir ah chuan ka lo awm fal a, an chezia atang chuan Mizoram kan chak ni awm tak a ni. Boruak ni hulh hulh a reh deuh hnu ah chuan Hriati chuan min rawn pan a, ‘i lo khawhar hman em?’ min rawn ti a, Kei chuan, ‘tute nge a? pakhat nen phei kha chuan in inhriat that hmel em em mai lehnghal a’ ka ti a, Hriati chuan min melh zak zak pah hian, ‘engtikah emaw ka la hrilh ang che, nang paw’n i nupui neih min hrilh bik lawk hleinem’ a ti a, Kei chuan, ‘i hre tho a lawm’ ka’n tileh hram a, ka mizia hi chu a ngei duhtu tan chuan a ngei awm thin maw le.

Chapter Discussion (0)

Log in to leave a comment on this chapter.

Sign In
No comments yet. Start the conversation!
Next Chapter · Part 4

Chapter 4