A la tlai lo

Chapter 1

By Red Wheelchair · ~9 min read

Park pakhatah chuan ka lehkhabu chhuah tawh mai tur ‘A THAR LEH THIN’ tih chu enlawkin, ka chhiar malh malh a, chhuah mai tur a ka tih tawh mahnise, han en nawn pawhin siamthat duhlai ka la nei tho mai. Ka kuthnu hi ka hmu tlingzo ngai tak tak lo, mahse siamhat fo loh hi a tha zawk, kan siamthat ngun lutuk chuan kan ti buaichuar mai mai ang tih a hlauhawm a ni.

Ka lehkha chhiar tui lutuk chuan khawtlai zel pawh chu ka lo hrechang lo a, note bu ah chuan ka duhthusamlo lai leh a lehpek atana ka insiamthatna lai turte chu ka chhinchhiah nghauh nghauh pah bawk a, chutia ka tui em em lai chuan ka phone chu a rawn ri ral ral a, ka han en chuan ka nupui Faki a lo ni a, kan nu chuan, ‘Zual, hna atangin ka rawn haw tawh a, khawnge i awm daih a, a tlai tawh a sin’ min rawn ti a, phone be chung chuan ka’n hawi kual a, khua chu a lo thim lek lek tawh a, upa in ‘unau hmelhai chhelchhawlh’ an tih ang hun vel a ni. Kan nu hnen ah chuan ‘ahh.. faki, a tlai tawh tih ka lo hre miah lo a ni. ‘A THAR LEH THN’ tihah khan ka lo tui deuh a lawm mawle, ka rawn haw nghal ang’ tiin ka chhang a, Faki chuan, ‘nia i tan a pawimawh zia ka hriatthiampui che, mahse khatia len chhuahpui reng lo khan In ah rawn haw ve tawh la, zanriah tui tak ka lo siam ang che’ a rawn ti nem diai a, Kei chuan ‘awle ka in khung fel anga, ka rawn haw nghal ang’ ka ti a, phone chu ka dahnghal a.


Ka bag chhunga pen leh lehkhapuan vel ka khung zo, ka kal sawn tur chuan, thaw ri hrak hi ka hria a, ka’n lehhawi chuan ka awmna atanga pen riat vel awm a hla ah chuan hmeichhe pakhat han en mai pawh a nula pangai tak tih hriat ngawih ngawih, a ngihno bei tawk chauh a ngo, a sam hnungzang thleng vel, a pian pawh mizo nula ah chuan nalh tawk tak a ni a, lian lai tur a lian a, a te lai tur a te bawk a, sa inphut mawi tawk tak a ni. A hmel puthmang erawh sir zawng a ka hmuh avangin ka hmu chiang thei lo, Sam bu tha leh nung siau mai a nei tih chu ka chiang hle thung. Amah a kun deuh bawk nen tun ang hun a ani ang hmeichhe pangai tak ka hmu chu mak ka ti deuh hlek a, hlim se la chu ka la hrethiam, a ngui hmel em em mai bawk si. Sana chu ka’n bih zuai a, 5:53pm. Haw tum a ka bag hrui ka koki a bah rem pah chuan, ‘bawihi haw tawh ang le, a tlai tawh a nia’ ka va ti ve ngawt a, ka bulah mi lungngai tak a an awm hi chuan nuam lo ka ti thei em em a. ka awmdan thleng hian a diklo vek hian ka hre thin. ‘Bawihi’ ti a ka va koh ve ngawt chhan pawh chu a kut veilamah zungbun pakhatmah a bun loh vang chuan nula la ni turah ka’n ngai ngawt a, kan nula-i chu rawn dak chhuakin hawihhawm takin lan mawi tum nan min rawn nuih ver ver a, a nui mawi khawp mai ‘lo haw va phawt rawh, i mi ngaihsaknaah ka lawm e’ a tih zuai raih zawh rual chuan a nui hmel pawh chu bo lehnghalin lehlam a hawi ta daih a, hmel lungngai tak bawk chuan a chhunzawm leh a ni. A hmel pawh ka hmu chiang thei ta, mitmeng zim lam, mahse meng fiah ang reng tak a ni a, a hmel puthmang ah chuan a hmelthat zia han hril duah tur lam ai chuan a duhawm zia leh ngainatawm zia sawi tur a tam mah zawk ang. Duhawm terh e tilo chuan, a nu zàm mai bawk a, chutiang mi chu a ni. Haw ta lo chuan ka letleh a, a bulah chuan ka thu a, ka bag ka mal chung a nghat chung chuan, ‘haw rualpui ah ka sawm lo che a, ‘a tlai tawh e’, ka ti mai a nia, tun ang hunah enge hetah i tih a? i lungngaih hmel bawk si’ ka ti nghal tawl a, kan nula-i chuan a aw a han thian kharh phawt a, ‘nia ka rilru a nuam lo lutuk ka rawn chhuak thawveng lawk a, nichin khan nangpawh laptop hmang lo in pen i hmang tho lawm. I thil tih ang ah kha chuan tunlai ah laptop vek a sin an hman tawh. Thil hi a lan ang ngawt hi a ni ngai lo a nia’ tiin min chhang a, Kei chuan, ‘Aw.. a ni dawn tak maw? ka hmanraw hman te i lo hre vek a, engmaw i buaina chu?’ ka ti leh a, kan nula-i chuan, ‘midang hriat ve chiloh a nia, nang hi mi chanchin zawh i ching a nih hi mawle, ching tam tawh suh. A pawi thei a nia’ min ti a, ‘ching hran lo e, sawi chhuahna tur i mamawh takin ka tia nia. Han sawi chhuahte hi a tha ve a, ka’n ring chhin teh ang ngaihzawng vang a nih loh chuan chhungkaw thil a ni ngei ngei ang’ ka ti a, kan nula-i chuan, ‘Nia a pahnih chuan a dik ve ve thei ang.’ a ti chuai raih a, Kei chuan ‘chuan hetia tih hi a chin fel dan tha ber ah i ngai a maw?’ ka tih lai chuan zawhna nei hmel tak hian min lo en reng a, Kei chuan sawi chhunzawm zelin ‘heta i rawn tlanchhiat san vang hian i buaina chu a fel theih i ring a maw? fel mai lo e. I tlanchhiat san chhung chuan a fel lo anga, fel phah a hnek in a pun lun tulh tulh zawk dawn. Engvang nge? tih chu ka hrelo, va haw ta la, i buaina chin fel dan tur chu a buaina neitu in i hre zawk’ ka tih chhunzawm zat a, kan nula-i chuan, ‘i hriat ve hmel ang reng bawk sia’ a ti sap a, Kei chuan ‘hriat ve hmel min ti suh, ka hre lutuk zawk a lawm’ ka lo ti a, kan nula-i chuan ’engtinnge i hriat a? Kan in hre ngai pawh a ni silo a’ a ti ha a, Kei chuan, ‘lo ngaihtuah buai zel phawt mai rawh, tlereuh i ngaina ve hle a ni maw?, ka ti a, mak tih hmel tak hian ‘chûngte lehzel chu engtin nge i hriat a? min ti leh a, Kei chuan, ‘hriat a har vak hleinem, I tlereuh inbel hi chu tun a i inchei dan ang ah kha chuan a inrem lutuk lo em a lawm. Duh bik deuh nei in i thlak ngai vak lo pawh a ang. Chutichuan i hrethiam tawh mai em?’ tiin ka fiam pah a, a nui seih a ‘i rilru a chak hle mai. Haw i tumna kha a rei tawh hmel si a, i la awm reng tho bawk sia’ a ti a, Kei chuan, ‘rei tawh e, mahse la awm duhna chhan tha deuh ka nei a’ tiin ka chhang a, kan inkawm tlangnel deuh hnu chuan, ‘ka haw tawh dawn a sin i haw ve nghal dawn em?’ ka ti leh a, kan nula-i chuan, ‘ka la awm rih deuh ang’ a ti a, tunah chuan a aw phawi pawh a zangkhai sawt tawh khawp mai, a hma ai chuan a zia awm tawh tih a hriat theih a, pen thum vel ka pen tih in kan nula-i chuan, ‘thianpa tunge i hming?’ a rawn ti a, ka bag sawi rem pah chuan, ‘ni dawn tak maw hming kan la in hrilh miah lo tak e, ‘Zuala’ tiin min ko dawn nia, nang ve le?’ tiin ka zawt let a, kan nula-i chuan ‘Vanlalhriati ka nia ka thiante chuan ‘Hriati ‘ tiin min ko thin, nang paw’n chutiang chuan min ko thei ang’ a ti a, a nui seih bawk a, Kei chuan, ‘a nihleh Hriati mangtha aw.. ka haw a hun tawh tlat’ ka ti a, Hriati chuan ‘chu computer chu i thiam lo tak tak maw? ka lo zirtir dawn che a mi? nikhat ah darkar hnih kan zir a nga’ tih pah chuan a dar a chhin ak a, ka thluak ka vawrh vir ve nghal a, thiam tak chu ka ni lo na a, a bo lo tawk vel a thiam tho chung chuan, ‘nia computer hi ka zir ngun tawh. Mahse, ka thiam thei miah lo min thiam tir theih phawt chuan’ ka tih lai chuan min lo pawt chat in Hriati chuan, ‘ka zirtir thiam thei che a nih phawt chuan ka pualin thawnthu i ziak ang’ a ti ta mai a. Kei chuan bangbo tak a, ‘engtin maw i tih?’ ka tih chuan, ‘Keimah beh chhan in ka tihna a nia, chu chu i hlawh min pek tur a ni ang, Writer i ni lo’m ni?’ a ti a, a hmel chu a hlim deuh tawh bawk a mahse a lungngaihnain a la kian san lo tih a hriat a ni. Inngaihtuah pah a, hawikual vut vut chungin, ‘aw a tha lawm, a phurawm dawn khawp e. Mahse, i chanchin hriat ka nei tlem si a’ ka ti a, Hriati chuan, ‘reilote chhung pawhin i hre teuh thei a nia, i la hriat belh zel dawn a lawm. Anih Zuala mangtha aw.. ka chelh khawtlai rei tawh lutuk che’ min ti a, Kei chuan, ‘min chelh khawtlai hleinem. Ka awm khawtlai zawk a lawm’ tiin ka mangtha let a, park piah lawk a bus stand chu ka pan a, ka hawilet leh chuan a lo thu kun leh ngiai tawh a, lungngaihna engemaw tak a nei tih hai rual a nilo. Bus rawn thleng hmasa ber ah chuan ka lawn a, a lan theih chhung chuan Hriati chu ka thlir reng a, ani chuan vawikhatmah min rawn en ve lo a en ngai a en reng ringawt mai a ni. Computer min zirtir chungchang ah pawh khan bo lo tawk vel chuan ka thiam sa reng a, kan inzirtir hun ah chuan ka thiamlo der mai dawn a ni.

Chapter Discussion (0)

Log in to leave a comment on this chapter.

Sign In
No comments yet. Start the conversation!
Next Chapter · Part 2

Chapter 2