Chapter 2
Ka hming chu Malsawmzuala a ni a, kum 32 a upa ka ni. Fapa kum 5 mi leh nupui fel tak ka nei a, tunah hian In nuam tak ah kan cheng ho mek bawk. Ka nun pum ah hian ka chhungte duh ang fapa ka ni thei ngai lo a, an duh ang pakhatmah ka tih hlawhtlin sak theih tak lovah chuan vawikhat, ka damchhung a a vawikhat nan thil pakhat ka tihsak ve ta a, an duhang, an duh zawng ngei nupui ka neihsak ta a ni. Ka duh zawng nilo in ka chhungte duh zawng.. Kha inneihnaah khan ka tel velo hrim hrim a, ka taksa chiah a tel a ni. Ka duhthlanna, ka duh zawng leh ka nunte nen chuan ngaih pawimawh kan hlawh lo tlang khawp mai, anni’n an hmang a, an hlim a, an lawm a, kei ka inthap thung si. Kei chu hmanrua mai chauh ka ni, kha inneihna a famkim theih nan a hmanrua mai. Mihring chu chengho tur a siam kan nih angin a tir chuan hlimna leh lawmna tur awm hauh silo ah ka in ti hlim chawp a, ka hlim ve viau tho mai, duh thlan tur dang awm hek lo le.
Faki nen chuan nupa inngeih tak kan ni a, nupa hlim leh inpawh tak erawh kan ni chuang lo. Hun rei tak chhung innei tawh mah ila, nupui pasal angin kan in en lo hle a ni. Keiin a lak atanga fuihna leh thurawn ka mamawh hun ah ka hmu ngailo a, ani pawhin min rawn derna leh a thil tihtur min hrilh a nei ngai bik lo. Kan mum mum in kan mum dun tawp mai a ni. Ka nu nen erawh chuan an inmil phian a, Faki chu company pakhat a hna tha tak thawk a ni a, inkawp rem thei ila chu nupa tha tak ni thei tur chu kan ni.
Kei ve thung chu Keimah ah hian engemaw ruak lian tak awm hian ka hre tlat thin a, chu chu Faki’n a hnawh khat zo bawk silo. Hriati bul ah kha chuan a danglam deuh chuan ka hria, chu keimah a hmun ruak lian tak awm a chu thu ziah leh ka thil ngainat dang hmang a hnawh khah ka tum thin. Mahse, tuithawl mawng pawp a tui chhun khah tum ang chauhin reilote ah a ruak leh thin. Thu ka ziak ve fova, mahse engah tak tak chuan ka chhuah ngai hlei law. Eizawngtu ber chu Faki hi a ni. Nileng a office lama a buai thin avangin ka fapa pawhin a nu ai chuan min ngai zawk daih a, ka awm tam zawk tlat a lawm, Hriati ngaihtuah roh roh chungin ka chhukna tur bus stand chu ka thleng ta a, inchhung ka luh rualin Faki chuan min lo chhawn var a, ka fapa chuan ka kekawr ah lo pawtin min lo lawm ve bawk a, ka nu chuan a tih dan ngaite bawk in tlai tawh lo turin min zilh a. Faki thung chuan “I tum aiin i rawn tlai palh a nimaw?’ tih chauhin ka tlai chungchang a sawi a, a inthlahrunawm duh khawp mai. Inpawhna tak tak kan nei lo ka ti tak na a, Faki hian tha takin leh zaidam takin min chhawn reng a, Keimah hian ka zir lo em a ni.
Ka fapa chentawk tur chuan ka’n kun hniam a, ‘Bawiha, hei i chocolate duh ber chi, a dik em ?’ tihpah chuan chocolate chu ka phawrh a, rang takin a la a, pindanah a tlan luhpui nghal a, din chhuah leh pah chuan, ‘Ka Nu, naupang hriat lai chuan ti khan min ti tawh lo la’ ka ti bai bai a, Faki chuan ‘chaw ei ah ka lo nghak che a, ka riltam tawh lutuk, hawh i ei tawh ang ‘ a lo ti vat a, hetiang vel hi kan nia, a tir ah hlimawm loh mahse ka in tih hlim hram hram avangin ka hlim thei mai a, tun ah mi tamtak awh rawn ka ni tawh a, chhungkaw tha leh duhawm tak nen in nuam tak ah mi tamtak duhthusam ah ka cheng mek a, mahse ka hlim tawh si lo.