TAPCHHAK TITI
*TAPCHHAK TITI*
R.Lalsiamkima da Kop
*Chapter 3 : Kawngkhar Bula lo ding chu*
Kawngkhar bula lo ding chu Zorema a lo ni a. Remruata thian tha ber, Aizawl-a a phatsan tak kha.
A kawr chu a huh deuh hnuang a, a bag chu a khai a. A mitmeng chu a chuai raih a a chau tih a hriat ngawih ngawih.
"Remruat, i lo haw daih tih ka hria a, ka rawn zui che a nih hi," Zorema chuan a ti a, a aw a khur deuh a.
In chhung chu a reh duk a. Mei chauh chu a ri sep sep a. Muani chuan Remruata kut a chelh nghet sauh a.
Pi Zami chu a tho vat a. "Zorem, lo lut rawh. Meilum hi lo ai la,Thingpui lum ka lo pe ang che."
Zorema chu tapchhak bulah chuan a thu ve ta a. Rei fe chu tumah an tawng lo.
Remruata chu a insum thei ta lo. "Zorem, min ngaidam rawh. I hna ka laksak che a, i hming ka tichhia a. Ka thiam loh vek a ni,min ngaidam ang che."
Zorema chu a thaw halh a. "Ka thinrim lutuk a, ka rawn zui che a. Mahse kawngah ka ngaihtuah a. Nangmah ang tho in keipawh ka chau a ni. Kan pahnih hian Adullam puk kan mamawh ve ve a ni."
Muani chuan a mittui a hru a. "A dik a ni. He tapchhak bula kan thut hian kan inhau tur a ni lo, kan inngaidam tur a ni zawk."
Pi Zami chuan a kut a phar a. "Ka tute u, in inngaidam thei anih chuan in thinlung a lo dam leh ang. Adullam-ah khan Davida leh a mite kha an inngaidam a, an inthurual a, chuta tang chuan an lo chak ta a ni."
Zorema leh Remruata chu an inkuah a. An mittui a tla a. An phurrit tak chu tapchhak mei lum chuan a ti dai ta ni berin a lang.
Zan rei lamah chuan Muani chuan a thil thup chu a sawi chhuak ta.
"Remruat, i awm loh chhung khan... i pi hian min enkawl a. Ka pa boral hnu khan he tapchhak hi ka in a ni tawh a. I lo haw leh hi ka lawm lutuk."
Remruata chu a nui a, a thinlung a zang ta huai a. Hemi zan hian a hrethiam ta, tlan bo na ni lovin, lo kir lehna a ni tih chu.
---