Hmeithai fapa Jack-a
Nikhat chu, khawpui-ah chuan Jack chu a sakawr neihchhun nen chuan an kal dun hnak hnak mai a. Ani hi hmeithai fa niin, an nufa chauh chuan an cheng dun a. Khawpui-ah mamawh te lam turin a rawn kal a ni.
Kum 15 chauh a ni na a, puitling ang maia engkim a tih ve vek thin avangin thiltih vel a zeihawi hle mai a. A sakawr-ah te chuan hruaihrual-te paiin, a kawngah chuan chemte a pai tah mai bawk a. A sakawr nen pawh an inhmeh ve hle a ni.
Ani hi pa thihsan, a nuin a tulpui tak a ni a. A pa khan a thihsan khan, a farm bak ro thil dang engmah a hnutchhiah lo. A nu hmangaihna nasa tak erawh a dawng a, a vannei a ni.
An nufa chauhva khawsa an nih avangin, loh theih lovin Jack-a pawhin a phak tawk a tih ve a ngai a. Sikul kai rual anih in, zirna lama thahnemngai mi anih avangin a nu chuan sikul ah a dah a. Tlai lam sikul banah, a nu hnathawk lai te chu lo thlir pahin, a phur changin a han thawhpui ve leh thin a. Naupang a-thu-chang, a thiltih pui erawh rintlak a tamlo thin hle.
Nimahsela hun a liam ve zel a, a thawh theih a tam ve hret hret zel a. Pa angchhung a awm nilo mah se: nu hmangaihna, khirh tak si hnuaia seilian anih avangin, a rilru-ah no-na a langlo reng reng a. Ani ang rual, sikula a thiante nena han khaikhin phei chuan, paber-in duhtawka a hrual hrep hnu ang mai hian a hriam hraih mai a. Anih tur ang hi a ni thlarh mai a ni.
Kum 15 a rawn nih chhoh takah chuan, a hmel hriam hraih mai kara a mitmeng fimkak mai chu hmeichhe tleirawl te hmuhnawm tih a tling tawh a. Mite angin, incheina nei ve lemlo mah se, anni mit hmuhah chuan a hnathawhkawrte chu incheina a tling hliah hliah mai.
Chutih rualin, heng thiltr hi a thian, mipa ho chungah chuan a thleng dik ve tlat lo.
A kawng fêk råt mai chunga a darpharh hlai hlap mai te chu hmuhnawm a tling chho tan ve ta. A pa sakawr, a rochun taka inthazo tak maia a han inperhkai auh maite chu a nu tan pawh a lungmuanthlak ta ngei mai.
Khawpui a thlen dawn chuan a han dak a, kulh kawngka a thil inziak lian tak mai chu a hmu ve ta a. Ngun takin a chhiar a, a kal leh ta zel a. Khawchhung a thlen chuan Lal In lam panin a kal nghal a. Sipai-ho hnena a han sawi chuan Lalpa hnenah chuan an luhtir ta a.
“Chibai, Lalber. Jack-a ka ni e. I khua leh tui zinga mi ka ni. I fanu bo thu ka lo hre ve chauh mai a, a pawi ka ti hle mai. Tunah hian a zawng turin kal ve ka duh a. Khawilai atanga bo tan nge tih te min hrilh theih chuan ka lawm hle ang.”
“Tlangval, ila naupang hle mai si a; Sipai tawrawt tak takte pawhin an hmuh zawhloh chu I hmu thei bik dawn em ni? Mahse I tum a nih chuan ka dal hauh lovang che. Ka hnen I rawn thlen theih hlauh chuan I duh apiang min dil la, ka pe ang che. Sipai hote u, pangpar huan ah khan zu hruai ta che u”
Jack-a pawh chu lungthil hmun a thlen chuan a beidawng ve hle mai. Ngun takin zawnglian kalna tur awm chu a rilru in a ngaihtuah a, a thlen chin pawh a hre lo.
Thawklehkhatah a sakawr chu a ding ta thut mai a, ani pawh a tla thelh nghe nghe a. Engdang ni lovin, kawng a tawp a lo ni.