HMANGAIH OFEL-I
GENESIS 2:18-ah: 'Lalpa Pathian chuan, mihring amah maia a awm hi a ṭha lo ve...,' tiin a lo ziak a;
Mahsela, kei, kei ve hi zawng, 'Mihring,' tia an sawi hi ka tling ve zân lo nge? Hmânah leh tun thlengin kei mah chauh ka la ni reng chu a nih hi.
Khawharna leh lunglenna te hi ka tana duan nge, ka tan hian khawharna leh lunglenna te hi duan an lo ni zawk tih te chu ka ngaihtuahna luahtu an ni fo mai.
Hringnun awmzia hre turin kum 2006 vau thla ni 4 chuan tirh luih ka ni a; pian phung danglam tak pianpuiin, thihna nen meuh pawh hian kan insul pêl thuak tawh ti ila ka sawi sual lo ang.
Ka dam chhuah theih nana mite min ṭawngṭaisakna zozaite khan ka nunna derthawng tak chu chelh betin, ka tem hman zuai thihna pawh chu ka pumpelh thei ta hram a nih kha.
Chu ka hringnunah chuan Khawvel te reuh tê pêk ka ni ve a;
Kan in chhûng dung zau lêm lo tak leh, ka ṭhut-lirh te (Wheelchair) chu ka hringnun ramri leh huang chin min khamsaktute an ni.
Ni e, kei hi mite'na, 'Vohbik,' tia an sawi ṭhin huanga mi chu ka ni ve a;
He ka nihna ka pawm hma daih aṭang tawh hian ka nihna zawk chuan kei chu min lo pawm daih tawh tih tun hnuah hian ka rawn hre thiam ve ta chauh bawk.
Chuti'ang teh hrepa hringnun hmangtu chu ni mah ila, Chawngzawng pawh hawisan lotu chuan kei pawh chu min lo la thlahthlam bik êm lo a;
Chhûngkhua leh ṭhian ṭhate hial pek ka nih bâkah, duhsakna leh hmangaihna ka dawn chinah ringawt pawh hlimna chhan tur leh nuihna chhan tur la nei ve chuan ka inhria a;
Hringnun hi hling hmun ringawt zawng a lo ni lo deuh pawh a ni'ang e!.
Rawlthar rilru te rawn pu chho vein, hmangaih leh duh neih awmzia te chu ka rawn hre thiam chho ve ṭan a;
Hmangaih te pawh tawng ve bawkin; mahsela, ka tawn zat hmangaihna erawh ka dawng ngai lo.
Tiam thu tiamtute pawh hi a hnu lawkah chuan hliamtu an chhang leh fo a; rei lo te chhûng atan thlasik a lo thleng phut a, nipui a lo thaw leh thuai ṭhin ang mai hian an kumtluang sawi ve te pawh chuan rei a awh ngai lo.
Samlam taka ka thinlung min ruksaktu, amah Ofel-i nena kan intawn hma zawng phei kha chuan thinlung ka nei ve tih pawh ka inhre ngai lo a;
Mahsela, a neitu ang maia rawn luahlumtu Ofel-i avang chuan thinlung ka lo nei ve reng a ni tih chu ka hre ve ta chauh a ni.
Chumi nî chuan nî dang ang thoin ka nileng hun tuntawi nan lehkhabu chhiar leh hla lungleng ngaihthlak te chu ka ṭan leh ta a, a châng hi chuan hringnun hi kalkhat tia nin ngawih ngawih châng ka nei ve ṭhin.
Chutihlaia ka lungkham ve ber ṭhin chu eng tik nî-ah emaw content creator niha youtuber lar ve thawkhat tak nih kha a nia.
Video siam dan te zirin, eng eng emaw ho tê tê ka buaipui chho a; mahsela, rei pawh ka buaipui hmain ka tih mi a ni ve chiah lo tih erawh ka hre thiam vat thung.
A lo rei tâk hnuah phei kha chuan dam chhan tur ber pawh hre loin, hringnunah chuan ka beidawng titih a, kha tih lai hun kha ka tan chuan hun thim ber lai a ni hial âwm e!
Tum nghet lo ka inti-in beidawng hma ka inti hle a, ka ṭhian dangte nana ka inkhaikhin pawhin, kei chu duap bik leh nêp bik ka inti hle.
Hun leh nîte chu ka tel loin an liam zung zung ni mai hian ka hria a, hringnuna ka beidawn ve vawi khatna a ni hial ta ve ang.
Hringnunah chuan tih tur nei ve tawh lo ang riâkah ka inchan a;
Pu C. Vana hla sak, 'Kan dam chhan,' tih hla te chu ka phun rem vel ta mai mai a, kei maha kei mah chu ka inti bo zo a ni ber e.
Chuti'ang chu ni tho mah sela, ka beidawnna leh khawharna te chuan ka rin loh lam daihah min hruai kaiin, thu leh hla lamah chuan min awi tlei thei thil tam tak ka zu hmu chhuak a;
Chuta chin chu ka tum thil leh duh thilte thlakin, eng tik nî-ah emaw, 'Ziak mi,' tia an sawi ṭhin chu nih ve theih ka inbeisei ta zawk a.
Chuti'anga hringnun ka hman chhoh ve mawp mawp lai chuan ṭum khat chu ka inbox reh leh khawharthlak zetah chuan message pakhat hi a rawn lut ve hlawl a.
Chutah, inbox chhûnga message a sena lo lang vâ-ah chuan lutin min rawn betu thil rawn thawn chu ka bih chiang vat a;
Inhre lâwk sa ang mai hian reels pakhata a comment chu like-sak tura min rawn tiin; kei pawh chuan a sawi ang chuan ka lo tihsak ve mai bawk a.
Rei vak loah "Ka lawm e," tih leh nui hmel lem (Emoji) chu min rawn thawn lehin, eng chu ka hria ni maw? Ani chu ka lo be chhunzawm ta duah mai a, ani pawh chuan hawihhawm taka min rawn chhâng lêt ve zelin; chutichuan, internet kawngkamah ṭhian thar kan inchhar chu a ni ta der mai.
Chutihlaia ka khawhar rûkna leh mal ngawih ngawih ni-a ka inhriatna te chuan ani chu châm ve reng tur leh, theihnghilh zui mai theih loh turah a lo ruat nghal a ni chêk ang, internet kotlang aṭang chuan ka ngaihvenin ka vei zui ta chu a ni hawt a!
A khât tâwka kan inbiak deuh reng bâkah, kan inhriat tirh aṭanga a hnu leh thleng pawhin ani chu biak a nuam êm êm reng a;
Hostel-a awm thu te chu min hrilhin, mahni in lum lama hâw a châk tawh thu te min rawn hrilh ve melh melh a.
An khua chu phai zâwl kianga awm a nih thu leh, favang leh thlasik inkar velah te chuan Hnah-sin a par vul chûk ṭhin thu te chu min hrilh bawk a.
Kei chuan an khua chu nawm hmel ka tih thua chhângin, "Min lo la hruai ve rawh aw...," ka han ti uang zui zat a.
"I fel viau chuan...,' tia min rawn chhângin, rei lo tê kan la inbiak chhunzawm hnu chuan, zan a lo rei tâk êm avanga kan inbiakna pawh chu duh tâwk rihin;
Kei chuan inmangṭha nan "Muttui aw," tih chu ka va thawn a.
Rang taka ani pawh chuan min rawn chhâng leh thuaiin "Muttui bik riau le," a rawn ti ve leh a, chu kan inmangṭhana thu chuan ka lung chu a tiawi veng veng mai.
Zan a lo rei a, ka lukham kham chung chuan ka mu meng kar a.
Zan tlai lunglen ka ti dawn nge, hriat ngai loh ngaia lunglenna ka ti zawk ang?
Zan danga ka lunglenna te kha chuan min ti hnîmin min ti ngui deuh ruih ṭhin a ni ngai a;
Chumi zana ka lenglenna erawh chuan, min ti hlimin, min ti nui nawn leh fo dawn a ni.
Ka ṭawngṭainaah te thleng chuan a vawi khat nan Ofel-i hming chu ka lam ri a;
Zawi muanga ka mit chu chhîng riai riaiin, ka suangtuahnate tuah mit tur chuan muthilh zai chu ka rel ve ta hram a.
Ofel-i nen chuan kar tluan a rei lo a, kum sang pawh ani nen chuan rei ka tih ka ring lo.
Mahse, kha'ng a tel ve lohna kum leh karte erawh kha chu kar azawnga kar rei ber leh, kum azawnga kum sei berte an ni hlawm.
Engtin tin emaw ama hnen aṭang ngei chuan a thlalak ṭhenkhatte chu ka kawl ṭha ve kiau a; thlalak mai mai mah ni se, a hlim lai hlimthlate chu ka hlimpui ṭhin.
Ka ta han ni êm tur chuan a ṭhat chungchuanna mai piah lamah, a mize lang tlang tak zuamawm chuang hauh si loh te chuan, phu loh Ofel-i chu min phu loh nawntir awn awn a ni ber a!
A mit meng fiah fel fai fim kâk mai te, a tâwk chauha a hnar ngul invuah thlak dan leh, a hmai tlang kam chho zawng zawngte chuan, thil pakhat chiang taka entir an neih chu 'Duhawmna,' a ni.
Zonu chhûl aṭanga chhuak ni âwma mawi lo khawpin pian a thiam a;
Hmai hma chu sawi loh, a hlimthla ka thlirna aṭang mai pawhin, min duangtu hi a thuhmun ang em tih chu min rinhlelhtir lek lek ṭhin.
Hun leh nîte chu her liam ve hret hret rengin, Mimkût thla, thla tâwp lam a lo her chhuah meuh chuan, an hostel a chhuahsan tawh tur thu Ofel-i chuan phur tak hian min rawn hrilh a.
Keiin, "I phur viau a ni maw?," tia ka zawh chuan,
"Aw, ka lung a leng thei lutuk, ka chhungte ka ngai tawh a," tiin min rawn chhâng a;
Chuta ṭang chuan alawm, van angel ni loin, kei mihring lei hmuam thaw thei ang bawka lungleng ve thei mihring fanu a lo ni ve ngei tih ka chianna chu.
Hostel aṭanga a chhuah hnu thleng chuan la inbe chhunzawm rengin, biak hrehawm leh awm nuam loa min siam ngai âwm ka hre lo a;
A lenna hmun ṭhenkhat nawm hmel tak takte chu a phone thlalakna hmanga lain, a pangngai aia hmuh nawm zawk leh lang mawi zawka siam danglam tur te chuan min rawn thawn a.
Kei paw'n ka thiam ang tâwka mawi chuan lo chhuahsakin, chu aia liantham leh hlu zawk tihsak theih dang nei ila ka ti ṭhin kher mai.
Internet kotlang aṭang ringawt chuan duhsakna leh ngaihsakna lantir a har hle a;
Chuti'ang chu ni tho mah sela, a lang lo lamah erawh ka ngaihsakin ka ngaihven êm êm lawi si.
Thu hlum tak tak hrilh paha han lêm kual vel dan ka thiam lo a;
Kei ang pian phunga mite pha zân lo leh ṭawng lama harsatna nei fawmkêm bawk si ta chuan, ka tih theih tâwk, ngawi renga hmangaih chu ka thiam êm êm a ni.
'Uṭawk tûr vawn,' an sawi ang maiin ka thinlunga thu awmte chu thupin ka up bo a, Keia hmangaihna dawihzep leh inkiltawih tak mai chuanin, phu loh Ofel-i hmangaihna meuh han cho chhuak pha tur chuan ka inring zo mawlh si lo;
'Ni lo, ni lo, ni lul lo e,' ka hlan ngam loh hmangaihna chu dawihzep luat vanga thâm ral tur tho a nih ai chuan, chu ka hmangaihna tuam mawitu nei lo, a nihna ang anga lang tlang ta chu, a ṭhelh mih rual loh hnâwlna mei sî chuan kâng ral zawk mai rawh se!.
Luite tui leh lui lian luang lai te chuan lengngha a hnar ngai ka hre lo a,
Van dum pawl pawhin chhawrthlapui leh si-ar-te khi a hnar ngai âwm ka hre hek lo;
Chuti'ang bawkin, ka hmangaihna chuan beiseina dah bo-a beisei loh dan a thiam lo a ni.
Kan inbiak ṭhin lai zawng zawng chuan ṭhian kan nihna chu hre reng chungin, a phena ka hmangaihna chu hai lanin a awm ṭhelh ṭhin a;
Mahse, mahni insitna leh inringtawk lohna te chuan min khap dai leh fo ṭhin.
Keiin, "Ani chauh," tiin; hmangaihna leh duhna thinlung pu mah ila, ani tan erawh chuan ṭhian hming koh leh awm ve satliah mai ka ni si a.
Ka hriat thiam êm êm hmangaihna chuan min hre thiam ve lo ni mai hian ka hria.
Kar a liam a, thla hial a vei ta;
Khami nî, phai ram, 'Singapore', tia an sawi hmuna a liam nî aṭang khan kan khawvel chu a hma zawng aia inhlat-in a awm ta a.
Kan hmun mai ni lo, kan hun thlenga a hran tâka chinah chuan ka thu thawnte (Message) chuan chhângtu a nei lo ṭan ta zeuh zeuh a, ka ngaihsakna te chuan ngaihsak a hlawh ve ta meuh lo.
Min theihnghilh ta chu ka ti êm lo a; hriat reng erawh ka ni ve ta chiah lo a nih hmel.
Intawng tura duan ni si hi, inkawp tura duan erawh kan lo ni zui ta lo a nih pawhin, ka theih chhûng ani chu chelha thlah liam mai ka tum lo.
Beiseiawma a awm loh lai pawhin ka beiseina lâk kian chu ka thei der lo a;
Chu beiseina chu khawi ata nei nge ka nih ka inzawt nawn fo.
Ka hmangaihna chu hmangaihna tak a tling zo ngut em tih ka inzawt leh a;
Chu zawng, ka chân ngai hauh loin ka thinlunga thu chhuak zawk chuan ti hian a rawn chhâng a, "Hmangaihnaah chuan i inteh zin poh leh i inteh tling lo fo ang a; i inteh loh lai erawhin i tling fo ang," tiin.
Ni a liam ve hret hret zel a, ka thinlung thu sawi zawm ta lo chuan kei maha kei mah chu ka lo inteh leh fo ṭhin a; ka intehna dana ka tlin zawh miau loh avangin nat thlawn aiah bansan mai chu ka thlang ta zawk a.
'Hmangaihna dawihzep tak zawng a ni ngei mai...,'
Tu khaw hriat lohin ka hmangaih a, tu khaw hriat loh bawkin ka beidawnsan leh ta si.
Ka rem hriatna zawng zawng leh ka thiam ang tâwk tâwk chuan inhnemhnanna dang chu ka zawng a; lehkhabu hrang hrangte keuin, online games hrang hrang ka khel kual a; a tawpah erawh chuan, a ngai bawk hian a ngai bawk kha ka ngai leh ṭhin.
Tlai khat chu engtin tin emaw amah ang tak (Upate'n, 'Zâwng fian phel ang mai' tia an sawi ang hlauh) unaunu a nei tih ka hai chhuak hlawl a.
Chuveleh, amah ka lo beisei ve ṭhinna thinlung lelawilo tak chuan, amah taka zawk kha a beidawnsan tawh miau avangin, amah ang tak mai ka han hmuh chuan, 'Amah ang tal pawh,' tiin, ka beiseina chu a khawlawilo zâwngin a kal ta a.
Amah taka zawk kha a awm tâk si loah chuan, amah ang tal chu beisei lehin âtthlak tak chuan ka chê a.
Kan inbiakna hmasa berah chuan, "Hi...," ka va ti a, ani pawh chuan pangngai taka min lo chhângin,
"Hi...," tih tho chuan min rawn chhâng a.
"I û, Ofel-i hian a sawi ṭhin che a, ka lo be ve ta ngawt mai che a nih hi," ka han ti a,
Ani chuan, "A nih chu, a lawmawm hle mai," tiin min lo chhâng leh a.
Tichuan, Ofel-i aiah a nau zawk chu duh luih tumin, ka hun âwl te chu ani biak nan chuan ka hmang zawk ta fo a, ka thinlung hawi khawlo laklawh chu kei pawhin ka hre thiam lo.
Hmangaihna tak lo zet, a chhera ka chher chawp chu hlanin, ka chher chawp hmangaihna chu a unaunu lakah chuan barh luih ngial ka han tum a;
Mahse, amah ang tak chu amah ang tak mai chuah a nih miau avangin, eng emaw ti laiah chuan amah taka ngei kha ka ngaiin ka thlahlel leh zawk fo ṭhin.
Kar loah, a tak tling lo ta nafam chu ka lemzia hriain ani (Ofel-i unaunu) hnen aṭang pawh chuan hnawlna zahkhua tisei ka dawng thuai a; mahse, chu erawh thung chuan tawrhna min siam belh lem lo.
Ka tawrhna chhan dik tak zawk chu, kei mah hi kei mah ni tawh loin, ka huat ṭhin êm êm mi lem ka lo nih reng tawh zawkna chu a ni.
Ka inten a, ka indem a; kei ngei pawh chu kei ma' lamah chuan ka ṭang tawh lo a ni ber e.
Hnaih ka tumna lamah ka hlatsan ta telh telh zawk a; tunah zawng, mi lawilo leh, hmai thing hawng vuah mai ka lo ni ta si.
Ka nun lo-ah chuan nun chhunzawm zelin, hriat loh karin hunpui (Kristmas) leh a vuakvette chuan min rawn nangching thuai a;
Kan ṭhenrual ṭhenkhatte chu mahni khaw lam ṭheuh pana rawn hâw khawm sang sangin, Kohhran huanga thil tih hrang hrang leh, biak in lam zai thawm pawh a ṭha chho mup mup hle.
Amaherawhchu, hman ang khan khawlaia zu ruih buai ching leh, naupang tualchaiin tho kêp silai lem an han kâp puak ṭhak ṭhak ri te kha hriat tur a awm ngai ta lo thung a; lehlam zawng taka ngaihtuah chuan kha'ng hun hlui te kha a ngaihawm ṭhin viau mai.
Ni a liam leh hret a, ni 24, urlawk zan a lo thlen chuan keini ṭhianho pawh chu inrawt phurin, kan ṭhianpa pakhat, Caleb-a te inah chuan tleivar êm chu kan peih tlan loh avangin riahho mai chu kan rawt tlang a.
Ei tur leh in tur an lo siam lâwk sa diam avangin ka ṭhiante chu an awl thawng hle a;
Online games te khel hoin, ei leh in turte kan eia kan in zawh hnu chuan Caleb-a room-ah chuan mutna phahin, mipa hlang ṭhiau 5 kan ni bawk a, kan mutphah chuan chhuatlai a zawh zau duh kher mai.
Mize hrang hrang inkawm khawm kan ni bawk a, kan thil sawi duh zawng a inang lo hlawmin, kan thil thlir dan pawh a hrang ṭheuh a;
Mahse, chu'ng chuan kan titina thu leklâm a tikhaihlak chuang lo.
Chutah, Caleb-a bawk chuan hmeichhe pakhat hnen aṭanga a love letter dawn chu rawn phawrh chhuakin, kan hriat tlan theih tur chuan a ri-in a han chhiar a; chu thil chu kan nuihpuiin kan hlimpui phian.
Kan thianzaho tan chuan chu zan chu a rei mawlh lo a, rei lo te chung atan ka khawharna te chuan min thlahthlam ve hial niin ka hria.
Sana bân vai chuan zanlai dar 12 a han pêl a; chuveleh, kan ṭhianho chu uangthuang taka inchibai kualin, Krismas chibai chu kan han inbuk fiam vel sap sap a.
Kan ṭhianho zinga mi, 'Fikfek-a,' tia kan koh fiam ṭhin chuan, "Hei en t'u, kei chu 'Krismas chibai,' min rawn titu pahnih lai an awm," tih pah chuan a phone chu a rawn lek chhuak zauh a.
Chutah, chu thil chuan thinlunga ka pai reng, vawi khat mah biak leh ka tum tawh hauh si loh Ofel-i ngei mai kha biak leh châkna min rawn siam a.
Ka ngaihtuahna nù but tawh chu, chu zan boruak thiang chuan rawn chhem daiin, ka hlan ngam loh hmangaihna kha a tak a lo ni ngei a, vui liamin a lo la awm lo tawp mai.
Ka ṭhiante pali an titi mawlh mawlh lai chuan kil khatah kei erawh chu mûk tak hian ka lo inngaihtuah vung vung a.
Ramhlua pui rauh chuan, "Ngaih nei i va ang ve?," a rawn ti a,
Kei chuan, "Ngaih loh ka nei em ni?," tia chhângin, kan ṭhianzaho chuan kan nui tlang bâwk bâwk a.
Kan mu ṭep tawh tihah chuan lukham bula ka phone dah chu hmet êngin, amah Ofel-i nena kan inbiakna hnuhnung ber thla hnih kal ta-a mi chu ka en deuh vang vang a;
Chutah, thâwk la halhin, "Krismas chibai, Ofel," tih tê mai chu ka va thawn a; nimahsela, chhânna ka dawng nghal mai lo!
Ka nghak a, ka ngaihven reng a, ka ngaichâng reng bawk;
Mahse, zan rei tak hnuah pawh chhânna ka dawng lo.
"A pawi lo e," ti-a maimitchhingin,
"Lung min rualpuitu ber ka ṭhiante ka kianga hi an awm a, chuti êma riang chu ka ni hleinem," tiin, mahni chu ka inhnem a, hriat loh karin ka lo muhil ve ta mai a.
Zing dar 6 vel a lo rik chuan ka chhak lama mu, Fikfek-a rawn che deuh sut sut chuan min ti harh hlawl a;
A thlang bera mu, ṭhianpa Huala pawh chu rawn harh ve nghalin, thla sik lai tih takah, zingkar boruak chu a vawt surh mai bawk nen, a tua mah chu kan tho chhuak peih lo.
A chhak bera mu, ṭhianpa Ramhlua chu rawn harh ve lehin, "Tho ila," a rawn tih avang chuan kan tho chhuak ta sap sap a.
Ṭhianpa Vanneia lo la muhil burh burh chu ti-harh mai loin, hnai set sawt aṭangin a thla te chu kan han lâksak a;
Ka ṭha chu ka ti bik hauh lo na'ngin, chu thlalakah kher kher chuan a ṭha bik vak lo khawp mai.
Ka ṭhiante chuan kan mut phah leh puanthuah zawng zawngte chu thlep felin; ka ṭhut-lirh-a min hlan kai hnuah kan in thlengin ka ṭhiante chuan min thlah hâwng leh a.
In ka thlenga ka ṭhu fel chiah tihah ka phone hmai chu ka han bih thuak a;
Beisei tawh loh hnu lama ka beisei rûk ang ngeiin amah Ofel-i chuan zan lama ka va biakna kha min rawn chhângin, "Krismas chibai le," tih thu chu min lo hnutchhiah kiau a.
Chutichuan, nakin lama biak chhunzawm tumin ka phone chu ka hmet thim hmuk a, tukṭhuan te kan ei kham hnu chuan biak in lama inkhawm turin kan insiam a.
Hun chu ṭha tê têin kan hmang nuam a, harsatna leh buaina lian tham êm êm tâwk loin hunpui chu kan hmang zo ta a.
Kum a lo thar ang bawkin ngaihtuahna thar nen min runtu hringnun runthlak tak chu kei mah maia ka hma chhawn leh a lo ngai ta.
Kan ṭhian ṭhenkhatte chu zirna avang leh, ei zawnna tling hna dapin, mahni mual hran lam ṭheuh chu an zawh leh hlawm a; tunah chuan kei mah chauh ka ni leh tawh.
A tirah chuan ka hringnun chu a khirhin a harsa chho leh viau a;
Mahse, ka theihna leh tuina lam tak, thu phuah leh ziah te chu kei mahah chuan rawn bet nghet ve tial tialin;
Engtik niah emaw, 'Ziak mi,' tia an hril fâk tham la nih ngei chu ka tum ruh leh zual sauh a.
Ka tumna te chu Pathiante Pathian hnenah thlenin, 'Awm-a ka ni,' tia min hrilhtu chuan min awmpui avangin, mal leh riang berah chuan ka inngai ta lo.
Zan khat chu Youtube-a mi pakhat podcast ka thlir mai mai laiin, a ruk têa ka la hmangaih leh duh êm êm reng Ofel-i chuan WhatsApp kal tlang chuan kei chu mi rawn be ve leh ta hlawl a.
"I buai em?," a rawn ti a,
"Buai lo e," tiin kei chuan ka lo chhâng a.
'Ni e, rei tak mi rawn tihbuai tawh loh chinah zawk khan alawm nasa tak maia ka buai zawk ni,'
A hma ang tho khan biak a nuam leh êm êm a; hun âwl a neih tlemzia te min rawn hrilhin, ralkhat aṭanga tih theih nei lem lo ta chuan ka lo hriat thiampui ve êm êm ringawt mai a ni.
Hun chuan min daih seng sela chu a mi biak reng nih ka châk a; chutihrualin, ka sawi châk ber erawh chu a hnu zelah pawh chuan ka la sawi ngam lo thung.
Kan inbiakna kar lakah, "Video min lo siam leh teh," tiin, a thlalak ṭhenkhat chu min rawn thawn leh zut zut a, ka phone hmai chu amah Ofel-i thlalak chuan a rawn luah mawi leh veng veng mai.
Ka thlir pah te chuan ka lo nui leh suk ṭhin.
Zep loh chuanin a mawi êm a, zep chung pawhin a la mawi tho zu nia!
Chumi zan aṭang chuan kan inbe ngawrh leh ṭan ta viau a, Ofel-i chu vawi khat tê mah ka la ning chhin ngai lo.
Ka duh a, ka hmangaih a, ka theih ang tâwk chuan ka ngaihsak hle bawk.
Be hmasatu zawkah ka ṭang ziah e tih loh-ah chuan, thu hriat hrehawm leh mawi lo tak chuan ani pawhin min chhâng ngai lo.
Mizote'n-a, 'Ramtuk thla,' kan tih, February thla kan chuang kai a, khaw vâwt chuan kian zai la rel loin, zan lam boruak leh zingkar phei chu a la vawt ṭha hle.
Ofel-i nen paw'n a khât tâwkin kan la inbe chhunzawm reng a;
Tunah zet zawng, thawh rim chhan tur leh beih fan fan chhan tur pawh ka nei ve ta niin ka hria.
Ka ngaih anga min ngaih ve kher ka phut lo a, ka hmangaih thu chu hlan lah ka la hlan hek lo.
Ṭhian kan nihna ngawt mai pawh ka tan chuan a hlu tâwk tawh hle a, a chhan chu, inṭhian ṭhatna karah chuan hnawlna a thleng ngai dawn lo ni-a ka hriat vang a ni.
Mahse, chuti maia ka hmangaih chu liamtir ka phal chuang hauh lo.
Eng tik hunah emaw, khawi lai hmunah emaw, a ruk têa ka lo khawl khawm sa hmangaihna hi, thup hlena tham raltir mai loin, hun hian hun a tih hunah hlanin ka la hrilh ve mah nâ le!.
Chutichuan, ka nghah mek hun chuan, 'Hmangaihte nî,' an tih Valentine day chu a rawn her chhuahpui a; mahsela, engtin vak nge ni chuang ang?...
Kan kar hlat zâwng chu a hla satliah mai pawh ni loin, khawvel hran daiha chêng ang mai kan ni si a;
Awihawm taka ka hmangaih thu hriattir chu a awlai dawn lo tih pawh ka hre chiang hle.
Zan a lo nih chuan ka pindanah inkhungin khumah ka ṭhu a, ka suangtuahna rama hmun laili ber leh kilkhawr ber thlenga dap chhuakin, heti hian ka thinlunga thu awm chu ka ziak chhuak ta a:
"Ngaih ve phak pawha ngai lotu che hian,
Ngaihven ber leh ngainat berah ka nei che a.
Ngaihtuahawm lutuk nih ka duh lo a,
I ngaihtuah loha awm erawh ka hlau ru viau thung.
Tawrh har ṭhin i zun hrui fei chuan kar hla aṭang pawh hian nghet takin mi phuar pha a.
I ṭhatna leh duhawmna te chu lo tem phain;
I duhawmnaah te chuan ka duh a awm miau si.
Darkartin mai hi nang ngaih nan a inchhek chhawk a;
Hriat reng i ni tih han hre reng la;
Ka theihnghilh ngai lo che tih hi theihnghilh ngai suh.
Ka damna i nih miau avangin natna angin 'Ka vei che,' chu ka ti thei lo a;
Mahsela, heti mai tê hian hlan che ka duh...,
I châm a ni,"
Hun chu a kal zel a, kum 4 lai a lo liam ta.
Chumi nî chu hun rei tak chhûng ka lo nghah tawh, Ofel-i nen hmaichhan ngeia kan inhmuh vawi khatna tur a ni a; ka zâmin ka phili angreng hle a; chutihrual chuan, a phurawmin a hlimawm hle bawk.
Inhmuhna hmun tura kan ruatah chuan, kei leh min kalpuitu tura ka sawm lawk sa diam tawh unaupa CT-a nen chuan kan thleng hmasa a, a hmunhma pawh a nuamin a fai viau mai.
CT-a hi ka nutei fa û ber niin, ka pianpui unau tlukin kan inzawmna a dang lem chuang lo.
Rei vak loah chuan, Car var nalh tak mai leh, a seat hma lama hmeichhe vun var nalh tak ṭhu hi kan lam pan chuan a rawn tlan chho a;
CT-a chuan, "Saw saw em ni ang...?," a lo tih chuan,
Keiin, "Aw, amah, ka Ofel-i ngei a ni!," ka lo ti a.
Chutah, Car kawngkhar aṭanga ani chu rawn pên chhuakin, a phei chheh inkhai rual tak mai chuan kan lam chu a rawn pan a;
Chuveleh, ka mit, ka lung phu, ka zungzam te chuan an hnathawh lai an chawlhsan ta emaw tih mai turin, ka lam pana rawn kal mek, ka zâwl lai Lasi chuan min ai-kaih a.
A vawi khat nan a kut mâm nem thepa ka kut chu rawn banin kan inchibai a.
Ani chuan ka mitah tak chuan min enin, "Min lo nghak rei tawh em?,' a han ti a,
Kei chuan, "Rei lo e, kum 4 deuh thâw leh minute 5 lai maw le!," tiin ka han chhâng a.
Ani pawh chu lo nui ve sen senin, "Tunah chuan i kiangah ngei ka din tawh hi, a takah chuan eng nge ka an, min hmuh tum dan angin min hmu em?," tiin min han zawt a,
Kei chuan, "Chu ai ṭha chuan...," ka lo ti sap a.
Kan sira ṭhut hmun rem deuhna laiah chuan kal pheiin,
CT-a chuan, "Ka u Mam, heti lai khaw hmunhma vel hi ka'n fang kual teh ang," tiin, kan pahniha hun thâwl kan neih dun theih nan chuan min thlah fâl dun ta rih a.
Ka kianga ṭhu Ofel-i chu lung muan hmel deuh taka thaw sêk sêkin, ngawi renga thaw dêp dêp chung chuan keiin a kut lum thar thar chu ka chelhsak a.
"Ofel," tiin a lam ka hawi a,
Ani'n, "Aw, eng nge ni, sawi la?," mi han ti a.
Kei chuan ka hnunga bag awm chu melh zeuhin, "I ta tur a awm, hawng rawh," tiin ka hrilh a.
Pangpar mawi tak leh kawr fual vân rawng pâwl chu ka lâk chhuahtir a;
"Ka va'n lawm tak," tih pah chuan ka thil pek chu lawm thiam takin a pawm vawng vawng a.
Chutah, a mit meng ngaihnobei zeta min rawn melh karin, ka rin loh dan daih chuan, "Hei chauh hi maw?," a han ti nui sen sen a.
Kei chuan hrilh hai tak leh inthlahrung tak chuan, "Eng thil dang nge i la duh a?," tiin ka han zawt a.
Nui seih pah a, "Han ring chhin teh," tia min chhângin, rei vak lo ka inngaihtuah vang vang hnuah,
"Zungbun i duh em?," tia ka zawh chuanin,
"Aih," tiin min chhâng a.
"Ṭhi maw?," tiin ka han zâwt leh a,
"Aih ni lo," tiin min chhâng leh a.
"Chocolate lam chi te hi i duh em?," tia ka zawh leh chuanin,
"Aih, chuti'ang a ni lo," tih bawk chuan min chhâng leh a.
A tawp nan "Thuamhnaw maw?," tia ka zawhna chu,
"A ni lo lehzual!," tiin min chhâng fi-thla vek a.
Lungawi tawh lo lam lek leka "A nih leh eng chu nge i duh chu nia?," tia ka zawh leh chuan,
Nui sen sen chungin, "I thinlung...,", tiin min chhâng a.
Kei chuan, "Chu'ng te chu i ta vek alawm, i hria em...?, ka hmangaih che," ka ti a,
"Kei paw'n ka hmangaih che," tia min chhângin; tlai ni tla tur dul deuh ruih chu kan thlir liam a.
Engkim a kim a, hringnun a hlim a, lungawina chu kan ban phakah mai a awm a: hmangaihna kualkhat chhûngah mi pahnihte chu pakhat kan ni!
A tawp ta...